Пакистан очекува „наскоро позитивен развој на настаните“ во врска со Ормускиот теснец и Иран, по телефонскиот разговор меѓу началникот на армијата Асим Мунир и американскиот претседател Доналд Трамп, соопштија владини извори.
Интензивните дипломатски напори на Исламабад го отвораат патот за втор круг американско-ирански преговори, кои наскоро треба да се одржат во пакистанската престолнина.
„Очекуваме наскоро позитивен развој на настаните“, изјавија изворите, мислејќи на телефонскиот разговор на Мунир со Трамп, во кој разговарале за пакистанскиот процес на посредување и американската блокада на Ормускиот теснец. Трамп рекол дека ќе го „разгледа советот“ на генералот Мунир, кој му посочил на американскиот претседател дека блокадата на теснецот од страна на американските сили останува „пречка“ за можен втор круг преговори со Иран, наведуваат пакистански извори.
Трамп најави потпишување договор
Пловниот пат практично е затворен откако САД и Израел започнаа напади врз Иран на 28 февруари.
Техеран во петокот прогласи дека теснецот е отворен, но го затвори ден подоцна, откако Трамп најави дека блокадата на иранските пристаништа ќе продолжи, а во неделата американските сили задржаа ирански товарен брод откако отворија оган и се качија на него.
Сепак, Трамп во неделата најави дека американски претставници ќе отпатуваат во Исламабад на разговори со Иранците, а денеска најави дека ќе дојде до потпишување договор со Иран.
Техеран сè уште официјално не ја објавил својата одлука, но побара укинување на американската блокада на иранските пристаништа. Претходно пакистански извори соопштија дека се очекува Иранците да пристигнат во Исламабад во вторник.
