Големите олимписки кругови кои беа инсталирани на Ајфеловата кула за Летните олимписки игри ќе останат како трајна поставка на споменикот, објави градоначалничката на Париз.
Градоначалничката Хидалго рече дека тоа е убава идеја за да се спои безвременската француска икона, Ајфеловата кула, која првично била изградена за Светскиот саем во 1889 година, со глобалната икона како Олимписките игри.
„Сакам двете да останат заедно“ изјави Хидалго.
Ајфеловата кула е еден од најпознатите споменици во светот што привлекува околу седум милиони туристи годишно. Таа беше во фокусот на овогодинешните Олимписки игри, како централна локација за отворањето, но и за претставувањето на победниците.
