Новак Ѓоковиќ најверојатно ќе добие дозвола да настапи на Австралија опен во 2023 година, тврдат австралиските медиуми, објаснувајќи дека федералната влада го сменила својот став околу српскиот тенисер, кој во јануари оваа година беше депортиран откако се обиде да влезе во земјата без да прими вакцина за КОВИД-19.
21-кратниот гренд слем шампион се обидуваше да влезе во Австралија за да оди на своја 10-та титула од Мелбурн Парк, но беше сопрен на аеродромот во Мелбурн, по што 10 дена помина во центар за имигранти, пред да биде исфрлен од земјата поради ставот за вакцинирање. Токму тоа што не е вакциниран го спречи Србинот да настапи и на САД опен во Њујорк.
Забраната за влез на невакцинирани во Австралија веќе беше укината во текот на летото, но се стравуваше дека поради целата одисеја, Ѓоковиќ ќе добие тригодишна забрана за влез во земјата. Сепак, според весникот „Хералд сан“, австралиската влада не се решила на ваков чекор, што значи дека тој ќе може да игра повторно во Мелбурн.
