Претстојната сезона во Лигата на шампионите ќе донесе имплементација на новиот формат, каде сите учесници ќе бидат дел од една група и ќе се натпреваруваат по таканаречениот „швајцарски систем“. Оваа промена веќе предизвика многу коментари и дебати, и допрва ќе покаже дали е вистински или изнуден потег на УЕФА.
Навивачите се скептични за новиот формат, а од вчера и незадоволни поради подновената химна на елитното натпреварување која беше пуштена на дел од плејоф натпреварите. Химната на Лигата на шампионите има култен статус, не само кај фановите, туку и кај самите фудбалери. УЕФА решила да ја поднови со забрзување на темпото и додавање ефекти, што предизвика многу негативни коментари на социјалните мрежи и отвори голема дебата меѓу фановите.
Иако најважниот дел од химната, стиховите испеани на три јазици, останува непроменет, фановите сметаат дека непотребно се менува нешто што е „свето“ во фудбалот.
