Нова пратка со помош со речиси 400 тони храна за Газа тргна од кипарското пристаниште Ларнака. Помошта во Газа ќе биде доставена со товарен брод и платформа која ќе ја влече спасувачки брод.
Тоа ќе биде втора пратка помош преку Кипар, каде што кипарските власти воспоставија, во соработка со Израел, поморски коридор за да се овозможи однапред проверениот товар да пристигне директно во опколената палестинска енклава.
Добротворната организација World Central Kitchen (WCK) со седиште во САД ја договори мисијата со шпанската добротворна организација Open Arms, со финансирање главно од ОАЕ и поддршка од кипарските власти.
На својата прва мисија претходно во март, изгради импровизирано пристаниште за да овозможи истовар на речиси 200 тони храна во енклавата, која нема пристанишни капацитети. Денешната пратка вклучува два виљушкари и кран за помош при идните испораки преку океанот.
Одделно, САД планираат да изградат пловечко пристаниште во близина на Газа за да достават помош. Целниот датум за завршување е 1 мај, но може да биде готов околу 15 април, рече доцна во петокот кипарскиот претседател Никос Христодулидес.
Обединетите нации предупредија дека гладот најмногу му се заканува на северниот дел на Појасот Газа, каде 300.000 луѓе се отсечени од светот поради борбите.
Низ целиот Појас Газа, бројот на луѓе кои се соочуваат со „катастрофална глад“ се искачи на 1,1 милион, речиси половина од населението, според класификацијата за безбедност на храната на ИПЦ.
Бројот на луѓе за кои се смета дека се изложени на ризик од катастрофален глад во Појасот Газа е речиси двојно зголемен од декември, кога ИПЦ објави дека гладот во областа е веќе на рекордно високо ниво.
