Нигерија денеска изјави дека ќе прифати помош од САД за борба против исламистичките бунтовници сè додека се почитува нејзиниот територијален интегритет, како одговор на заканите на претседателот Доналд Трамп за воена акција поради, како што рече, злоставувањата на христијаните во африканската земја.
Трамп вчера изјави дека побарал од Министерството за одбрана да се подготви за можна „брза“ воена акција во Нигерија доколку најнаселената земја во Африка не го запре убивањето на христијаните.
„Ја поздравуваме помошта од САД сè додека таа го признава нашиот територијален интегритет“, изјави за Ројтерс Даниел Бвала, советник на нигерискиот претседател Боле Тинубу.
Бвала се обиде да ги намали тензиите меѓу двете земји, и покрај тоа што Трамп ја нарече Нигерија „посрамотена земја“.
„Уверен сум дека до моментот кога овие двајца лидери ќе се сретнат и ќе седнат на маса, ќе има подобри резултати во нашата заедничка решеност да се бориме против тероризмот“, рече тој.
Нигерија, земја со повеќе од 200 милиони луѓе и околу 200 етнички групи, е поделена на претежно муслимански север и претежно христијански југ.
Исламистичките бунтовници како Боко Харам предизвикуваат хаос во земјата повеќе од 15 години, убивајќи илјадници, но нивните напади се во голема мера ограничени на претежно муслиманскиот североисточен дел од земјата.
Иако се убиени христијани, огромното мнозинство жртви биле муслимани, велат аналитичарите.
Во централна Нигерија, претежно муслиманските сточари и претежно христијанските земјоделци често се судираат за пристап до вода и пасишта, додека на северозапад, вооружени групи редовно напаѓаат села, киднапирајќи жители за откуп.
