Рускиот опозициски политичар Алексеј Навални пред смртта напиша автобиографија, која ќе биде објавена во октомври, соопшти вчера неговата вдовица Јулија Навална.
Навални (47) почина во февруари во затвор во Арктичкиот круг.
Водечкиот руски опозициски политичар сакаше да стане претседател на Русија и беше најжесток критичар на Владимир Путин во земјата. Неговите сојузници, кои властите ги прогласија за екстремисти, го обвинуваат Путин дека го убил, обвинение што Кремљ го негира.
Навална на платформата Х напиша дека нејзиниот сопруг во 2020 година го почнал своите мемоари со наслов „Патриот“. Тој почнал да ја пишува својата автобиографија откако бил отруен, за што западните лекари тврделе дека е предизвикана од нервниот агенс „новичок“.
Навална најави дека книгата ќе биде објавена на 22 октомври истовремено на 11 јазици.
„Воопшто не замислував дека Алексеј ќе ја напише својата биографија. Верував дека ќе бидат во осумдесеттите, дека тој ќе седи на компјутерот со отворен прозорец и ќе пишува“, вели таа. „Но, работите се одвиваа како што се одвиваа. Страшно и многу, многу неправедно“.
Портпаролката на Навални, Кира Јармиш, опиша како тој почнал да диктира делови од својата книга додека се опоравувал од труење во Германија и дека книгата ја завршил во затвор откако се вратил во Русија во 2021 година.
Издавачот „Penguin Books UK“, во изјава за платформата X, ја опиша книгата како „комплетна приказна за животот на Навални и предизвикувачки повик да се продолжи работата за која тој го жртвувал својот живот“.
Тешко дека книгата ќе биде достапна во Русија, каде властите го забранија неговото движење поради екстремизам.
Минатиот месец Путин ја нарече смртта на Навални „тажна“ и рече дека сака да го размени со Западот под услов никогаш да не се врати во Русија.
