Мостот на Вардар кај Башино Село попладнево повторно е пуштен во сообраќај откако денеска поради надојдените води на Вардар фирмата „Синтек Инженеринг“ ДООЕЛ која го санира, поради опасноста од надојдената вода со своја механизација ги чистеше столбовите на мостот од надојдените трупци, гранки и секаков вид на смет, информира за МИА градоначалникот Марко Колев.
Инаку, локалната власт секоја година при поројни дождови редовно ги чисти столбовите на мостот од гранки и трупци, а денеска таа обврска ја презема фирмата која моментално работи на негова санација.
Поради изведување на работите за расчистување на столбовите на мостот, надојдените води на Вардар и големиот број на гранки и трупци од кои имаше опасност по мостот, граѓаните кои денеска претпладне дојдоа со своите возила до мостот на Вардар кај Башино Село не го поминаа туку се вратија назад и поминаа од другата страна на градот, велат граѓани кои редовно поминуваат по овој мост. Тие посочија дека немало издадено посебна забрана за движење по мостот, но биле предупредени од фирмата изведувач за опасноста на движење.
