Русија предупреди дека активностите на НАТО во близина на Калининградската област го зголемуваат ризикот од директен вооружен конфликт, додека Алијансата тврди дека нејзините активности се исклучиво одбранбени по природа и не претставуваат закана за Русија, објави „Спутник“ .
Руската амбасада во Брисел објави дека Москва е загрижена за она што го нарече „провокативни изјави и потези“ од страна на НАТО и неговите членки во врска со регионот Калининград, додавајќи дека воената активност на Алијансата во близина на западните граници на Русија е „невидено висока“.
Во соопштението се вели дека се прошируваат иницијативите за сопирање на наводната „руска закана“, вклучително и воени вежби од голем обем за време на кои се вежбаат офанзивни дејствија.
Руската страна оцени дека таков „авантуристички и неодговорен тек“ нагло го зголемува ризикот од директен вооружен конфликт и предупреди дека е подготвена да го употреби „целиот арсенал на оружје“ што ѝ е на располагање во случај на обид на земјите од НАТО да го изолираат Калининградскиот регион од остатокот од Русија.
Претставничката на НАТО, Алисон Харт, сепак, изјави дека Алијансата е одбранбен сојуз и дека ниту една од нејзините активности или воени вежби не претставува закана за кој било дел од Русија.
