На северот на Пакистан осум деца загинаа во одрон додека играле крикет по монсунските дождови, соопштија денеска локалните власти.
Тие изјавија дека инцидентот се случил синоќа во областа Шангла и дека децата биле на возраст меѓу 12 и 15 години, пренесе Ројтерс.
Речиси 15 деца поставија терен за крикет во близина на карпа, која ги затрупа по дождот, изјави за британската агенција претставник на окружната единица за итни случаи Санаула Кан.
„Локалните спасувачки тимови, на кои подоцна им се придружи и пакистанската армија, извлекоа осум тела по неколку часа, рече тој.
Едно дете е тешко повредено, додека другите се неповредени.
Друг функционер, Билал Кан, рече дека селаните први дошле на местото и дека биле од голема помош пред да пристигнат спасувачките тимови.
Обилните монсунски дождови и топењето на мразот во Пакистан минатата сезона предизвикаа поплави во планинските области на север, како и во јужните рамнини, при што загинаа повеќе од 1.700 луѓе, расели милиони и предизвикаа штета од милијарди долари.
