Во најновото гостување во емисијата „Ноќно студио“ на 4ТВ, портпаролката на Владата, Марија Митева, испрати силна и емотивна порака за Македонија, младите и потребата од постојан развој на државата.
Одговарајќи на прашањето што за неа претставува татковината, Митева со поетски и симболичен говор ја опиша својата поврзаност со Македонија, повикувајќи се и на мотивот за „вечниот пиреј“ како симбол на истрајност и опстанок.
„Македонија за мене е најголема љубов, татковина и сила по секој пораз. Таа е како вечен пиреј и нешто што е бесконечно. Не би можела со други зборови подолго да опишам што значи таа за мене. Ова е наша заедничка татковина и сè што треба да правиме е да градиме подобра иднина“, изјави Митева.
Таа нагласи дека државата не смее да остане заробена во статус-кво состојба и дека реформите во образованието, здравството и институциите мора да бидат континуиран процес.
„Не смееме да се задоволиме со статус-кво. Мора да гледаме напред и да се развиваме во сите сектори“, истакна портпаролката.
Посебен акцент Митева стави на младите, оценувајќи дека тие се најголемиот потенцијал на Македонија и дека државата мора да создаде услови тие својата иднина да ја гледаат дома, а не надвор од границите.
Според неа, европските вредности не треба да останат само политичка флоскула, туку да се применуваат во секојдневното функционирање на институциите и општеството.
„Зборуваме многу за ЕУ, но клучот е како тие европски вредности да ги имаме тука, дома. Европската Унија без тие вредности не би била тоа што е. Младите се сериозен потенцијал и јас верувам дека имаме капацитет заеднички да ја градиме државата“, порача Митева.
На крајот од интервјуто, таа потенцираше дека претстојното одбележување на 35-годишнината од независноста претставува можност Македонија пред светот да ја покаже својата култура, традиција и идентитет во најдобро светло.
