Мистериозна жена се почесто може да се види во друштво на севернокорејскиот лидер Ким Џонг Ун. Иако секогаш е во незабележителна облека, изгледа дека им паднала во очи на новинарите кои долго време се обидуваат да откријат која е таа.
Жената најчесто е фотографирана како шета зад севернокорејскиот лидер во јакна и панталони, со наочари, додека најчесто држи чанта во раката.
Таа беше со Ким и за време на големиот концерт минатата недела, а беше снимена како носи папка со хартии за време на неговиот говор пред парламентот, кога тој вети дека никогаш нема да се откаже од нуклеарното оружје.
Севернокорејските медиуми, кои се под строга контрола на лидерот, постојано објавуваат видео на кое се гледа споменатата жена, но нејзиниот идентитет никогаш не е откриен, пишува „Гардијан“.
Таа за првпат беше забележана од западните медиуми во февруари оваа година и оттогаш е покрај него.
„ Најмногу ја гледаме како носи торба, веројатно со работите на Ким кои мора да ги има при рака, како телефон, цигари и лекови“ – пишува „НК њуз“.
Се проценува дека е на возраст од 30 до 40 години, а многумина се сомневаат дека таа е негова братучетка. Ким наводно има најмалку две полусестри, Ким Сол Сонг и Ким Чун Сонг, и двете родени во 1970-тите.
