Американскиот Сенат го потврди Скот Бесент за министер за финансии, давајќи му на милијардерот и менаџерот на хеџ фондовите, централна улога во обликувањето на политичките амбиции на новата администрација на Доналд Трамп да ги намали даноците и трошоците и да управува со економските односи.
Номинацијата на Бесент беше поддржана од 68 членови на Сенатот, вклучително и 16 демократи, а против беа 29.
Бесент (62) веќе се појави како силен поборник за економската агенда на Трамп, која се фокусира на даночните намалувања и наметнувањето високи царини за кои демократите и некои економисти велат дека би можеле да го забават напредокот што Федералните резерви го постигнаа во ставањето на инфлацијата под контрола.
Тој ги отфрли тврдењата дека политиката на Трамп ќе предизвика инфлација и рече дека напорите на администрацијата да го зголеми производството на нафта ќе доведат до пониски цени. Како највисок економски функционер на Трамп, Бесент ќе се соочи со голем број предизвици, вклучително и управување со протокот на федерални пари откако владата го достигна плафонот на долгот вториот ден по преземањето на Трамп на функцијата.
