Русија денес го обликува идниот светски поредок, сама се бори против Западот, ги штити своите граѓани и ги враќа териториите на своите предци, изјави заменик-претседателот на Советот за безбедност на Русија, Дмитриј Медведев.
„Сакам да ве потсетам дека Руската Федерација е таа која ги штити граѓаните. Нашата земја е таа која веќе го врати и го враќа нашето наследство, а не обратно. И тоа ќе продолжи“, напиша Медведев на „Телеграм“.
Тој истакна дека „Русија денес го создава идниот светски поредок, а не САД со Британија или темниот Киев“.
„Тој еднаков нов светски поредок ќе биде изграден“, вели Медведев.
Покрај тоа, продолжи Медведев, Руската Федерација сама се бори против западниот свет и НАТО.
„Затоа, сите паралели со минатото се условни или неточни. Освен една: можеме сами да ги уништиме непријателските сојузи или моќниот непријател“, тврди Медведев.
Тој, исто така, рече дека Русија се обидува да ги зачува животите на своите војници и цивили што е можно повеќе во борбите. Рече дека истото не може да се каже за акциите на Украина.
„Нашите непријатели не стравуваат за животите на нивните цивили и војници. И тоа е разликата меѓу нас“, посочи тој.
Русија „од причини што се очигледни за сите, сè уште не го искористила целиот арсенал на оружје“, тврди Медведев и додава дека Русија не гаѓала можни непријателски цели лоцирани во населени места.
„И не само поради нашата вродена човечка добрина. За сè има време“, вели Медведев.
„На крај, но не и најмалку важно – само најголемото единство, највисокиот морал и секојдневната напорна работа можат да ја осигураат победата на земјата“, заклучи тој.
