За првпат во Штип, на 18 април (сабота), ќе се одржи „Марш за ангелите“, 41-ви по ред, посветен на жртвите од трагичниот пожар во дискотеката „Пулс“ во Кочани, информираа од здружението „16 Март 2025 Кочани“.
Маршот ќе започне во 16:05 часот од плоштадот „Слобода“, каде граѓаните ќе имаат можност да оддадат почит, но и да испратат силна порака за правда и одговорност.
Од здружението посочуваат дека ова е првпат маршот да се одржи во Штип, со што симболично се проширува поддршката и солидарноста за жртвите и нивните семејства.
„За првпат, чекорите на тагата, достоинството и барањето правда ќе одекнат и во Штип. Во знак на почит кон нашите 63 ангели, кон повредените и кон сите семејства што повеќе од една година ја носат најтешката болка, ве повикуваме да ни се придружите на 41-виот Марш за ангелите“, соопштија од „16 Март 2025 Кочани“.
Маршот е дел од континуираните активности на семејствата и граѓанските иницијативи кои бараат целосно расветлување на трагедијата и одговорност за настанот што ја потресе целата држава.
