Францускиот претседател, Емануел Макрон, на почетокот на денешната видеоконференција на „Коалицијата на подготвените“ изјави дека „конечно има шанса да се постигне вистински напредок кон траен мир во Украина“.
„Но, најважниот услов за вистински мир е серија многу робусни безбедносни гаранции, а не само гаранции на хартија“, предупреди францускиот претседател, пренесен од BFM TV.
Макрон додаде дека американскиот државен секретар Марко Рубио ќе се придружи на состанокот на „Коалицијата на подготвените“, која е составена главно од европски земји кои се подготвени да обезбедат гаранции за Украина.
Претходно денеска, во интервју за РТЛ, Макрон рече дека Русија е единствената пречка за мир во Украина и ја обвини Москва дека води хибридна конфронтација со Европа, вклучително и Франција.
Францускиот претседател нагласи дека „првата гаранција за безбедноста“ е обновата на украинската армија и дека на Украина ѝ се потребни силни безбедносни гаранции за да се спречи „нова инвазија“.
