Фудбалската репрезентација на Македонија во комплетен состав ги продолжува подготовките за натпреварот против Малта, прв за националниот тим во новиот циклус квалификации за ЕВРО 2024. Пристигнаа и Стефан Ристовски и Аријан Адеми од Хрватска, Елиф Елмас и Илија Несторовски од Италија, па селекторот Благоја Милевски полека може да се фокусира на тактичките замисли во пресрет на мечот во кој Македонија ја има фаворитската улога.
„Нѐ очекува нов квалификациски циклус, сите се радуваме дека повторно сме на собир вцо националниот тим и се подготвуваме за новиот предизвик. Прв ривал е Малта, веруваме во сопствениот квалитет, но никако не смееме да ја потцениме Малта. Верувам дека и публиката ќе дојде да нѐ поддржи во голем број и дека ќе успееме да ја оствариме целта“, вели Александар Трајковски.
Мечот против Малта се игра в четврток, во 20.45 часот на арената „Тодор Проески“, а потоа Македонија ја очекува и пријателски натпревар против Фарски Острови.
