Поради сериозната ситуација со шумските пожари што беснеат на повеќе локации низ земјата, Македонија официјално го активираше Европскиот механизам за цивилна заштита.
Одлуката е донесена по неколку дена интензивни пожари, непристапни терени и преоптоварени домашни ресурси. Преку механизмот, земјата побара меѓународна помош во форма на воздушна поддршка, човечки капацитети и логистичка опрема, со цел побрза и поефикасна интервенција.
„Од страна на Грција се дадени два канадери кои ќе бидат ставени во функција, а исто така и два пешадиски тимови се ставени на располагање преку ЕУ механизмот. Сите владини институции целосно се мобилизирани и активно се вклучени на терен“, изјави министерот за внатрешни работи Панче Тошковски.
Надлежните институции потенцираат дека домашните служби се ангажирани до максимум, но дека обемот и интензитетот на пожарите бараат меѓународна солидарност и брза координирана акција.
Ова е првпат годинава Македонија да побара надворешна помош преку Европскиот механизам за цивилна заштита, кој овозможува заеднички одговор на природни катастрофи и вонредни состојби на територијата на Европа и пошироко.
