Утрински Весник
Македонија

Левица: Одбиени амандманите за поддршка на домашното стопанство, развој на инфраструктурата и заштита на животната средина

Levica.webp.webp

Соопштение на Левица:

На вчерашната седница на Комисијата за финансирање и буџет, парламентарното мнозинство предводено од ДПМНЕ ги одби амандманите на Левица за финансиска поддршка на домашните мали и средни претпријатија, развој на енергетската и железничката инфраструктура, заштита на Охридското Езеро и природните подрачја, како и зајакнување на капацитетите на националните паркови.


Левица предложи зголемување на финансиската поддршка за малите и средните претпријатија, со цел поттикнување на инвестициите, модернизација на производствените капацитети, воведување нови технологии и зголемување на конкурентноста на домашното стопанство. Во услови кога домашното производство се соочува со сериозни предизвици, наместо да се создаваат услови за развој на домашните производители и отворање нови работни места, ДПМНЕ го одби предлогот за дополнителна финансиска поддршка на малите и средните претпријатија.

Одбиен беше и амандманот за започнување на проектот за гасификација на ТЕЦ „Неготино” и изградба на топлификациска мрежа за градот Неготино и околните индустриски и земјоделски капацитети. Дополнително, Левица предложи финансиска рамка од 80 милиони евра за изградба на индустриски железнички приклучок и товарен терминал за потребите на РЕК „Битола”. Овој проект е од значење за транспортот и истоварот на јаглен и други товари, намалувањето на транспортните трошоци и поврзувањето на индустрискиот комплекс со железничката мрежа. Мнозинството ги отфрли и овие предлози.

Во делот на заштитата на животната средина, Левица предложи 30 милиони денари за научна заштита, воспоставување управување и континуиран мониторинг на Студенчишкото Блато и Охридското Езеро. Предложени беа и дополнителни средства за санација на критичните делови од колекторскиот систем Охрид-Струга, со цел да се зајакне неговата функционалност, да се спречат еколошки инциденти и да се заштити Охридското Езеро од загадување со отпадни води.

Одбиени беа и амандманите за изработка на студии за валоризација на подрачјата на Кожуф и Огражден. Овие студии претставуваат неопходна основа за утврдување на природните вредности на двете подрачја и нивно потенцијално прогласување за заштитени подрачја. Со тоа би се воспоставила законска рамка за нивна трајна заштита, зачувување на биодиверзитетот и ограничување на активностите што би можеле да ги нарушат нивните природни екосистеми.

Левица предложи и формирање посебен фонд за националните паркови во вредност од 2 милиони евра, наменет за заштита на природните богатства, одржување на инфраструктурата и зачувување на биодиверзитетот. Дополнително, беше предложено формирање и опремување служба за маркирање на планинарски патеки и служба за планинско спасување во Националниот парк Пелистер, со што би се овозможиле побезбедни услови за посетителите, навремени интервенции при несреќи и подобро управување со планинските подрачја.

За Левица, јавните средства треба да се насочуваат кон зајакнување на домашните производствени капацитети, развој на јавната инфраструктура и заштита на природните добра како заедничко наследство на сите граѓани, а не да се сведуваат на буџетска распределба без јасна развојна и општествена цел. Повторното одбивање на ваквите предлози покажува дека власта нема слух за потребата од долгорочни инвестиции во економскиот и еколошкиот интерес на државата.

Можете да прочитате

Честитка од претседателката Сиљановска-Давкова по повод 22 Ноември – Денот на албанската азбука

Евакуиран тешко повреден алпинист од непристапен терен во реонот на Демир Капија

Мицкоски и Рама на промоција на „One Stop Shop“ на Ќафасан