Соопштение за јавност на Левица:
Во град кој секое лето се претвора во бетонска печка, каде температурите редовно надминуваат 40 степени, аква паркот во Скопје веќе три години постои само како ветување. Она што требаше да биде едно од ретките места за рекреација и разладување на граѓаните, стана симбол на неспособноста институциите да реализираат проект кој одамна е изграден и треба да биде во функција.
Особено иритира фактот што директорот, Данијел Апостоловски, со години наназад најавува отворање, секогаш „следното лето”, „за неколку месеци”, „наредната сезона”. Наместо отчетност за тоа зошто аква паркот не работи, скопјани добиваат нови рокови и нови оправдувања.
Проблемот е уште поголем ако се погледне пошироката слика. Езерото Треска, некогаш омилено скопско излетничко место, е оставено да пропаѓа (иако еден градоначалник ветуваше негова ревитализација). За базенот во истиот спортско-рекреативен центар „Борис Трајковски”, директорот Апостоловски најавуваше дополнително затворање заради санација. Наместо главниот град да располага со повеќе содржини за спорт, рекреација и разладување, една по една се губат и постојните.
Од друга страна, дури 48% од Македонците не можат да си дозволат летување од една недела, според податоците на Евростат.
Скопјани не бараат мегапроекти, туку тоа што веќе е изградено да функционира. Бараат Треска да не биде руина, базените да бидат безбедни, а аква паркот конечно да ги отвори вратите. Доколку директорот Данијел Апостоловски трета година по ред не може да го стави во функција аква-паркот, подобро да си поднесе оставка, отколку залудно да зема плата кога скопјани уште едно лето ќе го дочекаат без функционален аква-парк.
