Британскиот крал Чарлс III објави дека неговите третмани за рак ќе бидат намалени во новата година, нагласувајќи дека токму раната дијагноза, навремената медицинска интервенција и доследното следење на советите од лекарите му овозможиле да продолжи да живее активен и исполнет живот и за време на лекувањето.
Во претходно снимена порака емитувана на британската телевизија, монархот се приклучи на кампања што ги охрабрува граѓаните да користат скрининг тестови за рак, кои овозможуваат болеста да се открие во најраните фази, кога шансите за успешно лечење се најголеми. „Раната дијагноза едноставно спасува животи“, порача Чарлс, додавајќи дека токму тоа било клучно и во неговиот случај.
Пораката беше и момент за личен осврт: кралот зборуваше за своето искуство во изминатите 22 месеци откако јавноста дозна дека се соочува со рак. Одлуката да ја објави дијагнозата претставуваше исклучок од долгодишната практика на британското кралско семејство здравствената состојба да се третира како строго приватна. Бакингемската палата тогаш соопшти дека Чарлс се решил на транспарентност за да спречи шпекулации и да придонесе за поголемо разбирање и солидарност со милионите луѓе ширум светот кои се борат со рак.
Иако и понатаму не се открива точниот тип на ракот, официјалните лица наведуваат дека заболувањето било откриено поради „посебен проблем“ забележан за време на третманот на зголемена простата. Кралот во изминатиот период речиси во секоја јавна порака ја нагласува важноста од превентивни прегледи и упорност во лекувањето, испраќајќи сигнал дека раната реакција и довербата во медицината навистина можат да направат клучна разлика.
