Нема одговор од премиерот Димитар Ковачевски на прашањето дали Владата има 80 пратеници за измени на Уставот.
Наместо тоа, посочи дека сите пратеници треба да го поддржат вметнувањето на Бугарите во Уставот, а уставните измени е процес што трае. Смета дека Македонија е уценета од две партии.
„Уставните измени не се од еден ден. Обврска на сите пратеници е да го поддржат патот кон ЕУ и да не го попречуваат. Тоа не е процес на еден човек, една партија, една влада. Тоа е широк општествен и политички процес, кој бара консензус. Ние имаме политичка уцена во државата, каде што ВМРО-ДПМНЕ и Левицата велат дека не поддржуваат уставни измени, а кога ќе ги прашате кој им е планот – немаат план“, изјави Ковачевски.
Тој упати низа критики кон ВМРО-ДПМНЕ.
„Пратениците добиваат мандат во согласност со Уставот, законите, Деловникот на Собранието. И тие носат такви одлуки. На денот на изборите граѓаните им го предаваат тоа на пратениците. Сè што е во рамките на Уставот, законот, Деловникот – треба да го работат. Во програмата има зачленување во ЕУ. Тоа значи носење такви одлуки. Ај кажете ми каде во програмата на ВМРО-ДПМНЕ стои дека ќе фрлаат ‘молотови коктели’ како во јуни? Каде стои дека ќе блокираат закони за помош во време на најголема политичка и економска криза? Тоа никаде не стои, а тоа го прават“, додаде Ковачевски.
