Утрински Весник
Македонија

Ковачевски: Подобар животен стандард и нови инвестиции за економски раст

Ковачевски: Подобар животен стандард и нови инвестиции за економски раст

Премиерот Димитар Ковачевски со воведно обраќање ја отвори годишната конференција со наслов: „Економски предизвици во 2023 година: како да го одржиме економскиот раст и ја трансформираме економијата“, во организација на Советот за унапредување на високото образование и стратешки истражувања во рамките на Стопанската комора на Северна Македонија.

dobivaj vesti na viber

„Ако треба да ги споредам 2022 и 2023 година, би кажал дека 2022, веројатно, беше најтешката во мојата 22-годишна професионална кариера. Но, кога ќе ги видам резултатите на крајот од годината, начинот на кој се справивме со енергетската и економската криза и начинот на кој воспоставивме соработка на дневна основа со Стопанската комора, можам да бидам задоволен“, рече премиерот.

Ковачевски напомена дека „јануари е месец кога се гледаат резултатите од сработеното претходната година и се прават проекции за тековната година, така што верувам дека оваа годишна конференција ќе прерасне и во традиција. Нејзината важност е уште поголема бидејќи на едно место се обединети креаторите и носителите на економски политики, од една страна, и претставниците на бизнис-заедницата, од друга, сè со цел да се зајакне јавно-приватниот дијалог и да се презентираат гледиштата и идеите на двете страни. Тоа е и начинот на работа на Владата, која ја предводам, да работи инклузивно, со сите засегнати страни, да има слух за потребите како на граѓаните така и за стопанството бидејќи тоа е единствениот начин заедно полесно да ја пребродиме оваа најголема светска енергетска криза што ја живееме по Втората светска војна“.

„Соочени сме со голем број предизвици како економски така и политички, воената агресија врз Украина, а со тоа и раст на цените на енергијата и храната, инфлација, како и потреба од трансформација кон зелена енергија, индустрии што не загадуваат. Самите неизвесни ситуации ја ставаат во неповолна ситуација, секако, и деловната заедница. Но, бизнис-заедницата во Република Северна Македонија во Владата има сериозен партнер и преку заеднички дијалог ќе ги бараме решенијата“, рече тој.

Премиерот посочи дека „буџетот за 2023 година е мој прв буџет како премиер и лично ќе се залагам да покаже резултати, да ја обезбеди потребната основа за премин кон забрзан економски раст и развој на државата за понатаму да се постигнат посакуваните и потребни стапки од 5 проценти на БДП“.

„И оваа година фокусот на Владата е да обезбеди услови за раст на инвестициите. Наша цел е домашните и странските инвестиции да бидат двигатели на растот, да се зголемува извозот, да се намалува невработеноста, паралелно да растат платите и да се подобрува животниот стандард“, рече Ковачевски.

Можете да прочитате

Метеж на Табановце, се чека по 40 минути

(Фото) Свечено отворено 65. издание на Охридско лето

Убиецот оставил порака на фејсбук меѓу убиените 11 годишно дете