Кина соопшти дека категорично се противи на американската „злоупотреба на правосудните механизми“ и на вршењето притисок врз Куба, откако Вашингтон подигна обвинение за убиство против поранешниот кубански претседател Раул Кастро.
Официјален Пекинг смета дека ваквите чекори на американската администрација претставуваат продолжување на долгогодишната политика на дестабилизација, која дополнително ги подгрева тензиите во меѓународните односи и на клучните поморски рути.
– Соединетите Американски Држави мора да престанат да ги користат санкциите и правосудниот апарат како алатки за потиснување на Куба и да се воздржат од упатување закани за употреба на сила во кое било време – изјави портпаролот на кинеското Министерство за надворешни работи Го Ѓакун пред новинарите за време на редовната прес-конференција.
Реакцијата на Кина уследи веднаш по објавувањето на обвинението од страна на американското Министерство за правда, со што односите меѓу Вашингтон и Хавана влегоа во нова фаза на затегнатост.
