Министерот за здравство и социјални служби на Соединетите Американски Држави, Роберт Ф. Кенеди Помладиот, оцени дека САД за време на пандемијата на Ковид-19 направиле низа грешки, посебно во врска со мерките за затворање и односот кон стручњаците со поинакви ставови.
Истовремено, тој најави промени во пристапот кон подготвеноста за пандемија, истражувањата на вирусите и безбедноста на храната.
Во интервју за Си-ен-ен, Кенеди ги повтори критиките на сметка на начинот на кој американскиот здравствен систем одговори на пандемијата, тврдејќи дека рестриктивните мерки имале големи општествени и економски последици. Тој наведе дека затворањата, кои опфатија компании, училишта и верски установи, претставувале една од најштетните одлуки за време на пандемијата и оцени дека последиците од тие одлуки сè уште се видливи.
Според него, тогашната политика довела до нарушување на довербата на граѓаните во институциите, како и до ограничување на јавната дебата за здравствените мерки.
Кенеди ги отфрли тврдењата дека за последиците од пандемиската политика треба првенствено да се обвинува американскиот претседател Доналд Трамп, наведувајќи дека Трамп, според негово мислење, се обидувал да ги прекине затворањата. Тој најголемиот дел од критиките ги насочи кон поранешниот директор на Националниот институт за алергии и инфективни болести, Ентони Фаучи, кого го обвини за погрешно управување со пандемијата и преголемо влијание врз одлуките на здравствените власти.
Зборувајќи за тоа како САД треба да се подготват за идни пандемии, Кенеди рече дека е потребно да се промени начинот на донесување одлуки и повеќе да се слушаат лекарите кои работат директно со пациентите. Тој оцени дека за време на пандемијата често биле занемарувани искуствата на здравствените работници на терен, а поединечни стручњаци кои ги доведувале во прашање официјалните политики биле маргинализирани. Кенеди рече дека здравствените власти во иднина треба да користат информации од различни извори и да избегнуваат донесување одлуки кои не земаат предвид различни стручни мислења.
Тој наведе дека неговата администрација не се обидува однапред да докаже одредена теорија, туку сака да испита различни можни причини за зголемувањето на бројот на случаи на аутизам, вклучително и генетските фактори и факторите од животната средина.
Кенеди ги отфрли тврдењата дека неговите ставови поттикнуваат недоверба кон вакцините, истакнувајќи дека смета оти граѓаните треба да добијат што е можно повеќе информации пред да донесат здравствени одлуки.
Кенеди зборуваше и за иницијативата „MAHA“ (Make America Healthy Again / „Да ја направиме Америка повторно здрава“), која претставува еден од приоритетите на здравствената политика на администрацијата на Доналд Трамп. Тој рече дека работи на реформи во областа на безбедноста на храната, вклучително и построго дефинирање на високопреработените прехранбени производи и промени на правилата за одредени состојки. Кенеди оцени дека граѓаните се сè позагрижени за квалитетот на храната и оти државата мора да ја зголеми транспарентноста и довербата во прехранбениот систем.
