Мајка од Јута, САД, која споделувала совети за родители на Јутјуб за строгото родителство, е осудена на четири години затвор поради злоупотреба на дете, пишува Би-би-си.
Руби Франке (42) низ солзи се извини на суд. Таа претходно се изјасни за виновна за изгладнување и злоупотреба на сопствените деца. Таа доби минимум четири години затвор, а Франке ќе има 30 дена да се жали на одлуката.
На суд, државниот обвинител на Јута, Ерик Кларк, рече дека двете деца, тогаш на возраст од девет и 11 години, живееле во „средина слична на концентрационен логор“ и ја нарече мајката закана за заедницата.
„На децата редовно им се кратело храна, вода, не им беше дозволено да спијат на кревети и им беа забранети сите форми на забава“, рече Кларк.
Франке на суд се бранела со своето лудило.
„Ме наведоа да верувам дека овој свет е злобно место, полн со контролни полицајци, болници кои повредуваат, владини агенции кои го перат мозокот, црковни водачи кои лажат, сопрузи кои одбиваат да не заштитат и деца на кои им е потребна злоупотреба“, рече таа.
Франке беше уапсена заедно со нејзиниот деловен партнер во август 2023 година, откако нејзиниот неухранет 12-годишен син скокна од прозорецот на куќата. Полицијата соопшти дека детето потоа истрчало во куќата на соседот и побарало храна и вода. Тој имал повреди од врзување со јаже.
Со тоа апсењата го означија крајот на нејзината контроверзна кариера на социјалните мрежи. Френке собра повеќе од два милиони претплатници на нејзиниот канал, кој го започна во 2015 година, каде што делеше совети за строго родителство.
