Премиерот Димитар Ковачевски уверува дека градоначалникот на Крива Паланка, Сашко Митовски, ќе биде казнет ако му удирал шамари на полицаецот вработен во ПС Крива Паланка, Кристофер Стоевски.
Тој е дециден дека ќе има одговорност без разлика на функцијата која ја извршува. За политичка одговорност, Ковачевски смета дека тоа треба граѓаните да го побараат од него, бидејќи тие го избрале.
„Во однос на случајот во Крива Паланка, врз основа на своите надлежности, непристрасно, МВР постапува. И ќе бидат изречени санкции, без притоа да се гледа дали учесник во тој настан е на одредена позиција или не е на одредена позиција. Во однос на одговорност, градоначалниците се избрани од граѓаните и тие имаат одговорност пред граѓаните во рамки на својот мандат. Сите институции кои се дел од системот, во делот на санкционирање и во делот на оценка на ваков начин, треба непристрасно да одлучуваат“, кажа премиерот Ковачевски.
Полицаецот Стоевски излезе со јавно тврдење дека бил шамаран од градоначалникот, а откако седеле во иста кафеана. На ова, градоначалникот Митовски излезе со контра тврдење дека со полицаецот имале претходно нерасчистени сметки.
