Водечкиот германски берзански индекс DAX, падна за околу 10 проценти на почетокот на тргувањето денеска, паѓајќи на 18.489 поени додека инвеститорите продолжуваат да реагираат на огромните глобални царини воведени од администрацијата на Трамп.
Новите царини од 10 отсто за целиот увоз во САД стапија во сила во саботата, со дополнителни давачки за голем број трговски партнери што треба да бидат воведени во среда, вклучително и царина од 20 отсто за увозот од Европската унија.
Германската економија, која е базирана на извоз, ќе биде особено тешко погодена од новите мерки, пренесе ДПА.
Глобалните пазари реагираа на огромните царини откако Трамп ги објави минатата среда, бидејќи инвеститорите се загрижени за економските ефекти и нестабилноста на мерките.
Во петокот, DAX – кој ги мери перформансите на 40 водечки германски компании на берзата во Франкфурт – го заврши денот со пад од 4,95 проценти на 20,642, по неколку месеци наизменично објавување рекордни добивки.
