Врховниот суд на Финска ја прогласи пратеничката Паиви Расанен за виновна за поттикнување омраза откако ја нарече хомосексуалноста „развојна нарушеност“, во пресуда која предизвика критики од министри од крајната десница во владата и повторно ја отвори дебатата за границите на слободата на говорот.
Расанен, лекарка и членка на партијата на Христијанските демократи, ги изнесе овие тврдења во брошура која првпат беше објавена во 2004 година, а потоа во 2007 година повторно беше објавена на веб-страницата на Фондацијата „Лутер“ во Финска и на Финската евангелистичка мисионерска епархија.
Со тесно гласање три против два, Врховниот суд денес пресуди дека таа сторила кривично дело кога го повторно објавила тој содржина на Фејсбук во 2019 година и на својата веб-страница следната година. ѝ беше изречена парична казна од 1.800 евра. Судот оцени дека нејзиното тврдење дека хомосексуалноста е нарушување на психосексуалниот развој е неточно.
Расанен во овој случај имаше поддршка од американската конзервативна правна организација Alliance Defending Freedom, која се обиде нејзиниот случај да го прикаже како пример за цензура во Европа. Таа организација го зголеми глобалното трошење на судски спорови и други кампањи откако во САД успеа да ја поништи пресудата „Роу против Вејда“, со која беше заштитено правото на абортус, пренесува „Гардијан“.
Расанен изјави дека исходот е „шокантен“ и дека ќе размисли за жалба до Европскиот суд за човекови права. Пониските судови претходно ја ослободија од сите обвиненија.
Министрите од финската влада од партијата на Расанен, како и од националистичката Партија на Финците, веднаш повикаа на заштита на слободата на говорот и измени на законот.
Министерката за правда Лена Мери оцени дека законот треба да се менува, наведувајќи дека Партијата на Финците долго време смета дека прописите „не се доволно прецизни ниту предвидливи, како што бара принципот на законитост во кривичното право“.
„Граѓаните многу тешко можат да знаат што е забрането, а што дозволено“, рече таа.
Заменик-премиерката и министерка за финансии Рика Пура исто така повика на измени на законот, порачувајќи на социјалните мрежи дека „слободата на говор денес претрпе сериозен удар“.
Државниот обвинител Ари-Пека Коивисто изјави за финската јавна служба Иле дека се работи за пресуда без преседан.
„Претходно немавме ваква одлука во врска со кривичното дело поттикнување омраза“, рече Коивисто.
Премиерот Петери Орпо одби да ја коментира пресудата, порачувајќи дека политичарите не треба да коментираат судски одлуки.
