Филипините ја обвинија кинеската крајбрежна стража дека пукала со водени топови кон филипинските бродови и дека спроведува опасни маневри во Јужното Кинеско Море.
„Филипинската крајбрежна стража силно ги осудува опасните маневри на кинеската крајбрежна стража и нелегалната употреба на водени топови против бродовите“, соопшти крајбрежната стража на Филипини во саботата.
Во понеделникот, Кина одговори на овие обвинувања и рече дека филипинската крајбрежна стража неовластено влегла во нејзините води.
„Два брода за снабдување на Филипините и два брода на крајбрежната стража илегално влегоа во водите кај гребенот Ренаи на кинеските острови Нанша“, изјави Ган Ју, портпарол на кинеската крајбрежна стража, цитиран од Си-Ен-Ен.
Ју тогаш ја повтори територијалната претензија на Кина над островите и Јужното Кинеско Море, велејќи дека ќе продолжи да го спроведува законот во регионот. Државниот секретар на САД изрази поддршка за Филипините и ја повика Кина да ја почитува слободата на навигација.
Јужното Кинеско Море долго време е извор на тензии меѓу Филипините и Кина. Пекинг тврди дека има неоспорен суверенитет на речиси целото Јужно Кинеско Море, како и на повеќето острови.
