Претседателот на СДСМ, Венко Филипче, порача дека трагедијата што ја потресе земјата не смее да остане без одговорност. Тој истакна дека довербата во институциите е разнишана и дека граѓаните заслужуваат вистина и правда.
„Ние сме денеска рането општество, довербата во институциите е сериозно нарушена. Ако сакаме да ја вратиме, мора да спроведеме целосна, транспарентна и објективна истрага. Никој не смее да биде поштеден – ниту актуелни, ниту поранешни функционери или службеници. Ова не е прашање на политика, туку прашање на вистина и правда“, порача Филипче.
Тој апелираше до истражните органи и обвинителството редовно да ја информираат јавноста за текот на истрагата.
„Не смее да остане ниту најмала сенка на сомнеж. Ако постои дури и најмала индиција дека некој се штити, тоа ќе биде удар врз целото општество. Обвинителството мора да информира редовно – ако треба и двапати на ден – за секој чекор во истрагата. Граѓаните имаат право да знаат“, истакна Филипче.
Тој нагласи дека одговорност мора да има за секого, без исклучок.
„Потребна е одговорност од секој еден. Ова не е време за политички пресметки, туку за единство. Треба да покажеме човечност и солидарност. Ветувам дека нема да дозволам политизирање на овој процес, исто како што нема да дозволиме некој да биде поштеден. Како опозиција, будно и интензивно ќе го следиме процесот за да обезбедиме дека правдата ќе биде задоволена“, заклучи Филипче.
СДСМ останува посветена на транспарентноста, вистината и одговорноста за сите инволвирани во овој трагичен настан.
