На последниот концерт од официјалниот дел на концертната сезона „Дамар на слободата“, кој се одржа синоќа во НОБ, во рамки на „Мајски оперски вечери“ со изведба на грандиозниот „Реквием“ од Џузепе Верди, музичарите од оркестарот на Филхармонија ги заменија жолтите ленти кои го носеа врзани на рацете со црвени.
Од Филхармонија појаснуваат дека лентите значеа жолт картон за Министерството за култура, но жолтиот веќе стана црвен.
„Овој пат, лентите не беа заврзани на рацете на музичарите, за да се поштедиме од нови паушални толкувања во јавноста. Црвените ленти беа закачени на облеката и имаа форма на музичка снижувалка! И имаат само едно значење – Црвен картон за Министерството за култура!“, велат од Филхармонија.
Додаваат дека последните три месеци откако беше донесена одлуката за сместување на Џез оркестарот во објектот на Филхармонија, реномето и угледот на најстарата културна институција во земјава се целосно нарушени, а директни виновници за тоа се Министерството за култура и Владата кои наместо да го решат проблемот, немо и без никаков интерес уште повеќе го продлабочиле.
„Губиме публика, бидејќи некој свесно дозволува да се валка угледот на нашата институцијата, макотрпно граден од генерации македонски музичари во изминативе речиси осум децении. Секоја нормална држава во светот се гордее со своите институции кои градат историја во културата, а нашата држава, за жал, со својот однос покажува дека тоа не и е важно, и дека е подготвена поради штотуку ‘родена’ институција, да ја згази и поништи историјата градена со децении. Наместо да се гордее со изградената концертна сала за Филхармонија, бидејќи многу земји во регионот допрва работат на реализација на вакви историски проекти, нашата држава сака да ја измени првичната намена на објектот и да ја претвори нашата концертна сала во ‘Универзална’. Токму таков наратив имаа фиктивните приказни преку кои некој сакаше да и го испере мозокот на јавноста дека објектот на Филхармонија, наменски изграден за оркестарот на Македонската филхармонија, сега, преку ноќ, треба да стане ‘Линколн центар’ или ‘Лисински’“, велат од Филхармонија.
Додаваат дека новинарите, но и претставниците на власта ќе имаат отворена можност на 24 јуни да го прашаат и маестро Зубин Мехта зошто толку ревносно ја поддржува идејата за изградба на сопствен дом на Белградската филхармонија.
„Исто така може да ги прашаат и нашите колеги од Белградска филхармонија, дали ќе поддржат друга институција ‘привремено’ да се вдоми во нивната нова концертна сала која допрва почна да се гради?“, велат од Филхармонијата.
Додаваат дека Министерството за култура и Владата во ниту еден момент досега не застанале на нивна страна, ниту ги одбраниле од срамните напади во јавноста, туку напротив – преку својот молк уште повеќе го поттикнале јавното валкање на угледот и реномето на нивната институција.
Некои поединци во Владата, велат од Филхармонија, отворено на социјалните медиуми влегоа во паушално толкување на жолтите ленти, без да не’ прашаат што ни значат. Некој оттаму, на својот фејбук профил бесрамно напиша „Филхармонија срами се!“.
Бараат што поскоро, Министерството за култура и Владата да се заложат за промена на одлуката во нивна корист, за да се намали штетата која и е нанесена на нивната институција во последниве три месеци.
