Вчера беше пронајдено тело на дете во Естроф во Долна Саксонија. Телото го пронашол земјоделец додека косел ливада.
Полицијата утрово соопшти дека идентитетот на пронајденото дете се уште не може со сигурност да се утврди. Сепак, се сомнева дека се работи за 6-годишниот Аријан кој исчезна пред два месеци, пренесува магазинот Феникс.
Во соопштението полицијата не ја прецизира точната локација каде е пронајдено телото, ниту другите околности на пронаоѓањето. Единствено е сигурно дека земјоделецот го пронашол телото вчера околу 16:30 часот. Почната е истрага.
Полицијата се сомнева дека се работи за Аријан од Бремерворде, кој исчезнал пред два месеци. Момчето со аутизам исчезна од куќата на неговите родители на улицата Охфелдринг во населбата Елм на 22 април. Полицијата поседува снимка од блиската надзорна камера. Според информациите на Билд, на видеото се гледа како Аријан брзо се движи по улицата околу 19:15 часот. Во тој момент држи предмет кој личи на меч-играчка или стап и изгледа безгрижно.
По многубројните неуспешни пребарувања, во кои бил вклучен и Бундесверот, активната потрага по момчето во еден момент била прекината. Во потрагата се користени повеќе од 1.200 луѓе, полицајци на коњи и дронови.
Германските медиуми јавуваат дека местото каде што е пронајдено телото на детето е на околу 8,7 километри од неговиот семеен дом.
