Европскиот парламент планира да отвори нова канцеларија во Западен Балкан во обид да го подобри својот надзор над процесот на проширување, се вели во документот што го видел Еуроактив.
Одлуката за формирање нова канцеларија на ЕП на Западен Балкан, која беше усвоена за време на пленарната сесија на ЕП во Стразбур, ЕП ја гледа како начин за подобра поддршка на земјите кандидати или потенцијалните кандидати за членство во ЕУ во нивните напори да се интегрираат во Унија, велат од Еуроактив.
Како што беше објаснето, новата канцеларија ќе ги зајакне односите со парламентите на партнерите од Западен Балкан и ќе ја зголеми видливоста на претставниците на ЕП во активностите поврзани со процесот на проширување на ЕУ.
Се додава дека новата канцеларија ќе му овозможи на ЕП поголем надзор над процесот на пристапување со работа со постојните делегации на ЕУ кои работат под надзор на дипломатската служба на ЕУ, Европската служба за надворешна акција (ЕЕАС). ЕП има канцеларии за врски во секоја земја на ЕУ за контакт, комуникација со заинтересирани страни, организирање настани и интеракција со локалните медиуми, а во ноември минатата година одлучи да отвори нова канцеларија во Украина, на барање на владата во Киев.
Само неколку канцеларии на ЕП се основани во неевропски градови, вклучувајќи ги Њујорк, Адис Абеба и Џакарта. Албанија, БиХ, Црна Гора, Северна Македонија и Србија имаат статус на кандидати за членство во ЕУ на Западен Балкан.
