Помина еден месец откако САД и Израел започнаа воени операции во Иран, предизвикувајќи војна што го дестабилизираше регионот, ги наруши глобалните синџири на снабдување и предизвика меѓународна криза со цените на нафтата. Нападите врз енергетската инфраструктура продолжуваат, а поморскиот сообраќај низ стратешкиот Ормузски теснец останува суспендиран.
Американскиот претседател Доналд Трамп постави пет цели што Вашингтон мора да ги постигне пред да заврши војната, но сега, по еден месец, тој објавува дека САД наскоро би можеле да ја „завршат“ својата операција, и покрај тоа што некои од клучните цели остануваат недефинирани или неисполнети, пишува „Еуроњуз“ .
Според повеќето извештаи, нападите на САД и Израел значително ги намалија воените капацитети на Иран и убија десетици високи лидери. Сепак, овие тактички успеси не мора да значат постигнување на сите стратешки цели на претседателот.
Некои од нив се тешки за остварување, а доколку САД се повлечат од недовршената работа додека паравоената Револуционерна гарда на Иран е сè уште на власт, Трамп би можел да се соочи со политички последици дома и глобални реперкусии. Американскиот претседател инсистира дека операциите во Иран ги надминуваат сите предвидувања, и во однос на успехот и во однос на брзината. Следува преглед на целите на Трамп и нивната моментална состојба.
Уништување на ракетните капацитети на Иран
Една од главните цели што ги наведе американскиот претседател беше да ги уништи иранските ракети и „да ја срамни со земја нивната ракетна индустрија“. Администрацијата вели дека тие капацитети се значително ограничени, но Иран продолжува да лансира ракети и дронови, вклучително и серија напади врз Израел.
Трамп во четвртокот во Белата куќа изјави дека околу 90% од иранските ракети и лансери се уништени, а фабриките за беспилотни летала и ракети се „значително уништени“. Сепак, иранските напади се чини дека се интензивираа во текот на изминатата недела, при што Техеран редовно испукува беспилотни летала и напредни ракети кон Израел и соседните арапски држави од Заливот кои се домаќини на американски бази.
Пред едномесечната годишнина од војната, ракетен напад врз американската воена база во Саудиска Арабија во петокот повреди 10 американски војници и оштети неколку авиони, соопштија американски официјални лица кои разговараа со АП под услов да останат анонимни.
