Во пукање на бензинска пумпа во градот Колумбус во американската држава Џорџија, на границата со Алабама, ранети се девет малолетници, меѓу кои и едно петгодишно дете, соопштија властите.
Децата ранети во инцидентот што се случи вчера се на возраст од пет до 17 години, а се работи за седум момчиња и две девојчиња, пренесува АП.
Според соопштението на локалните власти, се чини дека состојбата на ниту едно од ранетите деца не е опасна по живот.
„Зголемувањето на оруженото насилство во кое е вклучена нашата младина ја погодува целата земја“, рече началникот на полицијата во Колумбус, Фреди Блекмон.
Тој додаде дека полицијата неуморно работи на отстранување на насилниците од улиците на Колумбус.
