Репрезентацијата на Португалија, во вторник од 20 часот, во осминафиналето на Светското првенство игра против Швајцарија. Во групата со Уругвај, Гана и Јужна Кореја, Португалија го обезбеди првото место по првите две кола, во последното коло загуби со 2:1 од Кореја, со што им овозможи на Корејците пласман во нокаут фазата.
Кристијано Роналдо постигна еден гол на овој турнир, во првиот натпревар против Гана, а потоа беше еден од најслабите играчи во тимот на Фернандо Сантос. Всушност, според статистиката на SofaScore, Роналдо се најде во најлошиот тим на турнирот со просечна оценка од 6,37.
Португалија и Роналдо беа една од темите на мундијалскиот подкаст на порталот „Дејли Мејл“, чии новинари и уредници жестоко ја критикуваа најголемата португалска ѕвезда. Според нив тој не би требало да биде во првиот тим. ,
„Роналдо повеќе не е најдобриот играч во тој тим. Всушност, тој не е ни блиску до најдобриот играч во португалската репрезентација. Ова Светско првенство е доста отворено и не можеме да кажеме дека некој е изразит фаворит. Има многу кандидати за титулата, а Португалија е секако еден од нив. Но, ако сака да има реални шанси да ја освои титулата, ќе мора да го исфрли Роналдо од првиот тим“, изјави новинарот Ијан Холт и додаде:
„Сигурно, многу млади играчи во тој тим го доживуваат Роналдо како идол и сакаат да бидат како него. Се е во ред и не би ме изненадило ако тоа е главната причина зошто тој е во тимот. Но, време е за некои други играчи“.
