Работната група за уставни измени не сака да зборува за временски рок за завршување на текстот на иницијативата.
Претседателката на работната група поранешна судијка Маргарита Цаца Николовска, по денешната средба рече дека не би сакала да шпекулира со време.
„Комисијата е составена од 23 членови. Секој ќе сака нешто да каже. Сето тоа ќе разгледува и сумира и во зависност од тоа ќе има драфтирање на предлог иницијативата“, рече Цаца Николовска.
Ветува дека ќе работат крајно транспарентно и јавноста за се’ ќе биде информирана.
На денешниот втор состанок на работната група бил разгледан деловникот, а како што рече Николовска, в петок ќе оди на гласање. Додека не биде донесен Деловникот, Работната група не може да почне со работа на суштинската материја.
Работната група за подготовка на предлог иницијативата внесување на Бугарите и други етнички заедници во Уставот ја сочинуваат 23 членови од кои десет се од редот на експертите, десет се предлози на политички партии и тројца се членови од институции.
