Претседателката на Собранието на Србија, Ана Брнабиќ, денеска оцени дека Србија ја помина една неверојатно тешка година и изрази надеж дека 2026 година ќе биде полесна и понормална, иако ќе биде изборна година.
„Неверојатно тешка година е зад нас, се надевам дека ќе влеземе во политички, ако не помирна, тогаш понормална година“, изјави Брнабиќ за ТВ Прва. Таа додаде дека претседателот Александар Вучиќ во својот говор пред Собранието синоќа повторно повикал на дијалог, но дека одредени луѓе тоа го толкуваат како слабост.
„Нема победници, нема губитници. Ова е наша земја, мора да споделиме и да видиме што ќе направиме заедно“, рече Брнабиќ. Претседателката оцени дека глобалните околности се тешки и дека не очекува значително подобрување во 2026 година, поради екстремизацијата предизвикана од социјалните мрежи и влијанието на различни групи во политиката.
„Блокадерите се вклучуваат во политиката заради лајкови, а не за благосостојбата на граѓаните. Сите го гледаат компромисот како знак на слабост“, додаде Брнабиќ. Таа истакна и дека 2025 година во Србија била обележана со изградба на патишта, инфраструктурни проекти и повисоки плати и пензии за граѓаните.
Брнабиќ посочи дека растот на бројот на патнички возила во Србија е доказ за економски напредок од 700.000 регистрирани возила во 2012 година, бројот достигнал околу 2,5 милиони на крајот од минатата година.
