Поранешниот англиски фудбалер Дејвид Бекам стана првиот британски спортски милијардер, објави денеска „Сандеј Тајмс“ во најновата листа најбогати луѓе во Велика Британија за 2026 година.
Заедничкото богатство на Бекам и неговата сопруга Викторија се проценува на 1,185 милијарди фунти. Со тоа, тие го зазедоа второто место меѓу спортските личности, зад семејството на поранешниот шеф на Формула 1, Берни Еклстоун, чие богатство се проценува на две милијарди фунти.
Бекам, поранешниот капитен на Англија, е ко-сопственик на американскиот клуб Интер Мајами, кој се проценува дека е највредната франшиза на МЛС лигата со вредност од 1,45 милијарди долари.
Педесет и едногодишниот Бекам, кој беше прогласен за витез минатиот ноември, работи и како амбасадор за брендови како што се Адидас и Хуго Бос.
Голем дел од богатството на Викторија Бекам доаѓа од нејзиниот моден бренд, откако таа се здоби со глобална слава како членка на Спајс Грлс.
На листата на најбогати спортски личности во Велика Британија се наоѓа и голферот Рори Мекилрој со проценети 325 милиони фунти по освојувањето на втората последователна Мастерс титула.
Промоторите Бери Ерн и Еди Ерн исто така влегоа во британскиот „клуб на милијардери“, со вкупно богатство од 1,035 милијарди фунти. Нивната компанија „Мехрум Спорт“ е еден од лидерите во светот на боксот, пикадото и снукерот.
Меѓу најбогатите спортисти се и Ентони Џошуа со 240 милиони фунти и неговиот ривал Тајсон Фјури со 162 милиони.
Седумкратниот шампион во Формула 1, Луис Хамилтон, е на петтото место со 435 милиони фунти, додека капитенот на Англија, Хари Кејн, и двократниот шампион на Вимблдон, Енди Мареј, се на десеттото место со по 110 милиони фунти.
