Промената на животниот стил, амбициите и желбата за полагоден живот се дел од причините за намалувањето на бројот на бракови и влошувањето на демографската слика во земјава, изјави министерката за образование и наука Весна Јаневска во гостувањето во „Ноќно студио“ на 4ТВ.
Осврнувајќи се на демографските предизвици, Јаневска посочи дека намалувањето на бројот на бракови и раѓања не е појава карактеристична само за Македонија, туку тренд што се забележува и пошироко.
Според неа, современиот начин на живот, променетите улоги во семејството, личните амбиции и желбата за полесен и покомфорен живот влијаат врз одлуките на луѓето за стапување во брак и формирање семејство.
Јаневска посочи и на избегнувањето на одговорноста како еден од факторите кои, според неа, имаат влијание врз ваквите трендови.
Истовремено, министерката нагласи дека економската состојба и вработеноста се важни, но не и единствени фактори кои ја определуваат демографската слика.
„Не можеме да се мешаме во личните одлуки на луѓето, но факт е дека имаме лоша демографија. Кога би имале поголем број раѓања, немаше да се соочуваме со празни училници и потреба од оптимизација во образованието. На државата ѝ се потребни млади луѓе кои утре ќе бидат дел од општеството и ќе го градат“, порача Јаневска.
Негативните демографски движења, според министерката, директно се одразуваат и врз образовниот систем. Помалиот број деца значи и помал број ученици, празни училници и потреба од приспособување и оптимизација на образовната мрежа.
Јаневска нагласи дека државата има потреба од млади генерации кои во иднина ќе бидат активен дел од општеството и ќе придонесуваат за неговиот развој, но истовремено потенцираше дека одлуките поврзани со бракот и семејството остануваат личен избор на граѓаните.
