18-годишната Јазмин Паез од Мајами е обвинета дека оваа недела се обидела да изнајми платен убиец да го убие нејзиниот 3-годишен син.
Инспекторите рекоа дека во вторникот биле контактирани од маж кој води лажна веб-страница за најмување убијци за да извести дека една жена контактирала со операторот за да договори убиство на нејзиното дете, пренесува Си-би-ес.
Според полицијата, основачот на веб-сајтот ја создал страницата за да ги фати и запре оние кои сакаат да ангажираат убиец. Полицијата соопшти дека осомничената ја дала адресата и фотографијата на детето за да му ја олесни работата на убиецот.
Полицијата ја проверила веродостојноста на информациите на администраторот на веб-страницата и ја уапсила младата мајка. Според истражителите, жената побарала работата да биде завршена до четврток. Таа побарала нејзиното дете да биде однесено некаде подалеку и да се убие што е можно поскоро.
Полицијата ја следела IP-адресата на компјутерот што 18-годишната жена го користела за испраќање барања до лажната веб-страница. Полицијата отишла на домашната адреса каде го користела компјутерот, а разговарале со бабата на детето. Полицијата го пронашла момчето живо и здраво во куќата.
Инспекторите потоа се претставиле како најмени убијци и разговарале со мајката на детето, која го потврдила барањето и се согласила да плати 3.000 долари за убиството на нејзиниот син. После тоа, Паез е уапсена.
На инспекторите им кажала дека била во романтична врска со личност на која не и се допаѓала да има дете и дека раскинале поради тоа, пишува Си-ен-ен. Паез се појави на суд во средата и доби правно застапување преку канцеларијата на јавниот бранител.
