Американската амбасада во БиХ денеска соопшти дека, како што велат, „претседателот на Република Српска Милорад Додик, како и секогаш, греши кога тврди дека во јули 1995 година во и околу Сребреница не се случил геноцид“.
– Фактите за оваа трагедија се поткрепени со беспрекорни форензички и други докази и се утврдени без какво било сомневање од меѓународните судови – соопштија од амбасадата, пренесува Српскаинфо.
Тие додаваат дека „не им помагаат на граѓаните на Република Српска безобразните коментари, полни со предрасуди за Сребреница и други чувствителни теми“.
– Тие се обид да се оттргне вниманието од актуелната кампања за лишување на народот на Српска од основните слободи, од нерешавањето на секојдневните прашања кои најмногу ги засегаат жителите на Српска, како што е растот на цените, и од неодговорното јавно задолжување кое става иднината на Српска под хипотека – изјавија од Амбасадата на САД.
Тие додадоа дека ќе продолжат да соработуваат со народот на Босна и Херцеговина.
– Ќе продолжиме да ги поддржуваме и да соработуваме со граѓаните на Босна и Херцеговина, вклучително и оние кои живеат во Република Српска, додека тие работат на градење на мирна, демократска и просперитетна иднина за себе во рамките на евроатлантската заедница на нациите – заклучуваат од Амбасадата на САД.
