Египетскиот претседател Абдел Фатах Ал Сиси денеска изјави дека Израел продолжува да ги избегнува напорите за постигнување прекин на огнот во војната со терористичката група Хамас во Газа.
„Ние веруваме дека Израел продолжува да ги избегнува своите обврски и ги избегнува напорите направени за постигнување прекин на огнот“, рече Сиси, говорејќи на Самитот на арапските лидери во главниот град на Бахреин, Манама.
Неговата земја беше посредник во преговорите меѓу Израел и Хамас, а тој предупреди дека Израел ја затвора границата кај Рафа со Египет „за да ја заостри опсадата“ на Газа.
Откако израелската војска го зазеде преминот Рафа минатата недела, протокот на помош, медицински материјали и гориво е запрен, што ги влоши тешките хуманитарни услови низ окупираната палестинска енклава.
