Дванаесет малопродажни објекти воопшто не биле регистрирани во Агенцијата за храна и ветеринарство како оператори со храна, во 9 објекти вработените лица немале извршено задолжителни здравствени прегледи, а исто толкав број оператори не ги задоволувале хигиенските барања за безбедност на храната. Ова се резултатите од извршените 192 вонредни надзори во малопродажни објекти – мини маркети и продавници за храна на инспекторите на Агенцијата за храна и ветеринарство (АХВ).
Контролирана беше исполнетоста на хигиенските барања за безбедност на храната, здравствени барања за вработените лица, температурниот режим на чување на храната, како и дефинираните рокови на трајност на производите, соопшти АХВ.
За утврдените недостатоци издадени се вкупно 30 решенија со мерки за нивно отстранување, а изречени се и 23 парични казни.
Уништени се триесетина килограми небезбедни производи (замрзнато месо, млечни производи, преработки од месо) и над 66 литри јогурт.
