Велес, 22 мај 2020 (МИА) – Општинскиот штаб за заштита и спасување на денешната седница донесе одлука малиот пазар во Нова населба во Велес да остане и понатаму затворен, ценејќи дека нема доволна вентилација поради затворениот простор во кој е сместен. Оваа одлука ќе остане на сила до крајот на наредната недела, информира на денешната прес-конференција градоначалникот Аце Коцевски.
Тој информира дека големиот градски пазар од денеска веќе е отворен за продажба на непрехранбени производи.
Појасни дека тие што ќе работат денеска, нема да работат во недела доколку е дозволено да се работи, односно ќе работат наизменично во текот на неделата се со цел да не се концентрираат големи групи на лица на едно место.
– Со цел да се обезбеди повеќе полесно движење на граѓаните ЈКП „Дервен“ ги отвори другите двата влеза на пазарот и ја засили редарската контрола и внатре во пазарот и надвор од него. Надвор од пазарот редарите ќе обезбедуваат растојание од 2 метри помеѓу граѓаните што чекаат, а внатре во пазарот ќе се грижат да не се создаваат турканици покрај тезгите,појасни Коцевски.
Воедно укажа дека задолжителна обврска и на продавачите и на купувачите е да носaт заштитни маски. ад/аа/
