Скопје, 23 март 2020 (МИА) – Ограничувањето на движењето на граѓаните од 21 до 6 часот, за време на изминатата ноќ, генерално се почитуваше на целата територија на државава. Лишени се од слобода 18 лица кои не ги почитувале мерките, информираше денеска на прес-конференција министрот за внатрешни работи Наќе Чулев за првата помината ноќ со полициски час.
-Полициските службеници лишиле од слобода 18 лица од кои пет на подрачјето на Тетово, две во Гостивар, кои и по опомената на полицајците на постапиле по укажувањето, туку агресивно се однесувале кон полицајците. Во Куманово лишени од слобода се две лица, а кај нив е најдено и оржје. Во Радовиш лишени од слобода се две лица, едно лице во Штип и шест во Кочани. Во Виница е константиран еден случај на прекршување, истакна Чулев.
Министерот информираше дека на територија на цела држава опоменати се 74 лица кои потоа постапиле по насоките на полицајците, а поднесени се девет кривични пријави. Според него МВР презема активности за утврдување елементи за поднесување кривична пријава за кривични дела за останатите сторители.
Припадниците на Министерството за внатрешни работи контролираат 618 лица со решение за изолација за здравствен надзор и 7307 лица со изјави за самоизолација при што вкупно на територија на цела држава има поднесено 77 кривични пријави. Полицајците извршиле 322 контроли на лица кои се во изолација и 3606 контроли со изјави за самоизолација. Од контролираните, едно лице не ја почитувало изолацијата, а 22 не го почитувале решението за самоизолација. Полицијата, рече Чулев, ќе поднесе соодветни кривични пријави. бк/скс/
