Крива Паланка, 23 март 2020 (МИА) – Општинскиот кризен штаб од Крива Паланка периодов презема низа мерки за заштита на граѓаните од ширење на Ковид -19. Постојано на терен се мобилните тимови со волонтери на Црвен Крст, а отворена е и телефонска линија за психо-социјална помош 070/949-776.
– Општинскиот кризен штаб е во постојана координација со сите чинители на локално и национално ниво со цел навремена превенција и заштита на населението од вирусот кој веќе ја однесе и првата човечка жртва во државата. Оформени се мобилни тимови во соработка со Црвен Крст за помош на стари и изнемоштени лица домашни услови, кои можат да се јават на телефонот 078/30 30 60, отворена е телефонска линија за психо-социјална помош 070/949-776, донесени се интерни правила за превенција и постапување на вработените во општина Крива Паланка, извршена е дезинфекција на ГП Деве Баир, јавни локации, улици, садови за смет, јавни тоалети, на сите простории во јавни установи и институции на локално, затворени се зелениот градски пазар и сите спортски терени и објекти, а извршена е дезинфекција на сите надворешни детски игралишта и урбана опрема и реквизити, информира службата за комуникација со јавност на Општина Крива Паланка.
Дадени се насоки на сите совети на станари да извршат дезинфекција на влезовите и заедничките делови од колективните станбени згради, а општинските инспекциски служби вршат постојана контрола на терен на почитувањето и примената на мерките и препораките од Владата и се врши и редовна контрола на сите повратници во општината.
Активирани се и телефонски линии за пријавување евентуални неправилности и непочитување на мерките и препораките .
Од Општина Крива Паланка апелираат граѓаните да ги почитуваат насоките на релевантните институции да се остане дома, да не се создаваат дома залихи од храна, хигиенски производи и лекови.ад/фф/
