Струмица, 19 март 2020 (МИА) – Се отстранува продажбата на текстилните производи од Градскиот пазар во Радовиш и истиот ќе биде наменет само за продажба на овошје и зеленчук со работно време во понеделник, среда и сабота, а ќе биде контролиран од полициски службеници и пазарната инспекција.
Ова е еден од заклучоците што ги донесе Штабот за заштита и спасување на општина Радовиш на денешниот состанок.
Покрај тоа, продолжува дезинфекцијата на улиците и јавни површини на подрачјето на општината и се воведува редуцирано работното време на вработените во Општина Радовиш од 08:00 до 14:00 часот, со по еден вработен во канцеларија.
Штабот ги задолжи такси превозниците секојдневно да вршат дезинфекција на своите возила, а погребните обреди да се одвиват во потесен круг на семејството.
До граѓаните се апелира да бидат совесни при купување на поголеми количини на прехранбени, заштитни и дезинфекциски средства и непотребно да не создаваат залихи.рт/бт/
