Скопје, 13 март 2020 (МИА) – Кризна состојба е прогласена во Дебар и Центар Жупа откако има уште четири потврдени случаи на коронавирусот од овие региони, информира попладнево министерот за здравство Венко Филипче.
На прес-конференцијата во Владата, Филипче рече дека сите пациенти кај кои е потврден вирусот се стабилни освен пациентката од брачниот пар од Дебар кај кои првично беше потврден вирусот. Кај неа состојбата е влошена и доколку биде потребно ќе биде приклучена на апарат за вентилација.
На Клиниката за инфективни болести има вкупно девет пациенти, а првозаболената чии резултати се негативни ќе биде пуштена на домашно лекување.
Од деветте пациенти една е од Скопје, и седум се од Дебар, од кои двајцата се брачниот пар, пет што дојдоа дополнително и четворицата од денеска.
Во изолација од првата група од 21 лица кои се сопатниците и досега кај нив нема симптоми, од втората група во изолација од 24 лица, 10 покажале симптоми, и четири се хоспитализирани.
Има сомнителен уште еден пациент кој е стигнат преку скопскиот аеродром од Германија и кај имал лесна покачена температура. – Тој е изолиран како и пациентите кои биле околу него, рече Филипче. бак/скс/
